By: 山の爹Posted on

正所謂「一雨成秋🍂」，剛剛打完兩個風🌀，天氣就即刻變得涼快左好多！又係山の家族👨‍👩‍👧‍👦出動嘅時候！

話說我地之前行過一次相似嘅路綫🗺️，係由藍地水塘再上屯門徑，今次我地就黎一個簡簡單單嘅熱身😈，由何福堂上屯門徑再行返去藍地水塘💯，西鐵🚈去輕鐵🚋走，交通方便😁

西鐵去到屯門站🚈，所有補給🍙、廁所位🚻都可以響西鐵站同 V-CITY 攪掂晒👍🏻，準備妥當就可以去 C 出口出發啦🆒
落到地面，沿住馬路向山嘅方向一直走⬆️，過1️⃣條馬路，然後響橋底穿過去屯門市廣場🏢，之後行上去「杯渡路輕鐵站🚋」
輕鐵站🚋其實係天橋黎🌉，可以跨過屯門公路過對面😎
過完天橋落番黎，右手邊會有賽馬會🐴，見到前面有紅綠燈🚦，我地就要過果條紅綠燈🚦喇。
交通規則要遵守🚸，乖乖等過馬路⭕
過到對面就迎黎第一個影相📸位「麥理浩徑終點」🤣剛出發就到終點🤪
就響隔離黃色欄杆🚧有個牌仔🏷️，寫住「麥理浩徑第🔟段」就係響呢個路口入去啦⛰️
頭一段都係呢 D 石屎路，唔算好斜👌🏻
沿途地下都會有黃色箭咀⬆️，指示你應該要行嘅方向，估計唔會行錯的😆
分叉路都會有箭咀 ⬆️
由西鐵站出發，行左 25 分鐘 ( 約 ☝🏻 公里 ) 左右😜 ( 估計正常 15 分鐘就到😅 )，開始要上樓梯啦🤤
起動🏃🏻‍♂️
不用十分鐘⏱️，就會黎到分叉路↔️，如果想去麥理浩徑，路口就轉右➡️，而我地就係向左走⬅️去屯門徑，呢個位有兩張長凳可以休息下🪑🪑
由上樓梯起計約 20 分鐘⏱️，會有個大涼亭⛩️可以料下充充電🔋，食下野🍙飲下水🍼抖抖，請記住「💡自己垃圾自己帶走」
山の恐竜🦖哥哥同山のメロン🍈妹妹響旁邊發現左一個魚池🕳️，入面有幾條金魚🐟，上面有張紙叫人唔好偷走 D 魚😅
叉好電繼續出發🔋，幾分鐘就會經過上次響「東升亭」碌番落黎果個路口😆
一路沿途嘅開揚位其實已經可以見到屯門😍同對面嘅青山⛰️，平時下午黎呢 D 位係西斜☀️爆晒光，天陰有天陰嘅好🌥️
由充電涼亭🔋黎到彩虹欄杆🌈範圍大約 20 分鐘⏱️由涼亭⛩️打開序幕，涼亭角落係好多人嘅影相位📸
今次係第3️⃣次黎啦🌈
其實彩虹欄杆🌈範圍好長，不過有開揚景📸嘅就大約有 50 米左右吧😆
由何福堂起點一路上黎，都有好多休息位🪑
影完一輪相📸，繼續我地嘅行程🏃🏻‍♂️，輕輕落一落斜↘️，幾分鐘⏱️就會去到若夢園有分叉路↔️
到左若夢園💪🏻，會見到指示牌🪧，我地再轉向藍地水塘🕳️進發➡️指示牌話 45 分鐘就會到⏱️
又要再上無盡嘅樓梯🤪😜沿途都有🪑可以坐下嘅😌
條路鋪得好靚👍🏻，唔行下真係浪費晒😌
正常條樓梯大約 10-15 分鐘應該行得完架喇🤣，不過我地山のメロン🍈妹妹行兩步又報下假案要🚽又話要坐下🪑又話要食下野🍫咁，我地行左 25 分鐘⏱️🤪呢個山頂就係今次行程嘅最高點喇🏔️，標高大約係 229 米左右🤏🏻，之後就係全部落山路段啦🥳
指示牌話去到藍地水塘要用 20 分鐘⏱唔抖唔停正常速度應該係得嘅😌
過左山頂，另一邊就唔再係大廈景🏢，而換上左山景⛰
沿途都有好多休息位🪑上山落山都唔怕無得休息👍🏻
見到藍地水塘啦🕳️繼續向下碌🏀
見到呢個分叉路↔️表示已經差不多到虎地燒烤場🔥喇😌向「虎地村」方向行就對了⬅️
不出幾分鐘⏱️就會到達虎地郊遊徑嘅起點 – 虎地燒烤場 🔥 好多人都會響呢到小休一陣，因為佢係上山落山幾條唔同嘅路嘅滙合點⭐
仲有人開張吊床添🛏️唔知佢有無問過兩棵樹呢🌳🌳😆燒烤場仲有兩格流動廁所🚻未係急需的話都可以落到藍地先去嘅😌
休息完一陣🔋離開燒烤場出口轉去右手邊➡️落斜路，如果想去嶺南大學🏫富地路果邊就轉左⬅️
沿途都係石屎車路落斜🔽落到斜路盡頭係倔頭路⛔黎，右手邊➡️有幾個路牌果度會有條樓梯可以行落去藍地水塘🕳️
有牌仔🪧寫住郊遊徑，虎地郊遊徑其實好長，我地上次行過了😅
呢段樓梯要小心 D 行⚠️，因為有大級有細級🧗🏻
到水塘啦🕳️，由燒烤場落到水塘大約 15 分鐘⏱️
由西鐵🚈出發黎到水塘🕳️大約係 4 公里👍🏻
呢日水塘好滿水⛲係咁流水落下游🌊
影完一輪相📸，沿堤壩行過對面，就會見到左手邊⬅️有條路可以落山↙️
落山嘅路比較窄🤏🏻，如果咁啱又有人上山大家就要就一就喇😌頭段係呢 D 樓梯，行一陣就會變平路👍🏻
回望堤壩📸
唔使 10 分鐘⏱️，就可以落到去石礦場🪨
然後沿住馬路一路行🚶🏻‍♂️，頭段無行人路🤷🏻‍♂️，之後就會有番🤓，我地星期六行，所以比較多泥頭車🚚🚛出出入入，如果星期日能會好 D😅 無咁沙塵滾滾☄️🏭
行到藍地大街路口↔️，向前行都可以出返青山公路⬆️，我地就轉左⬅️行入藍地大街，果度有個靚 D 嘅廁所🚻可以解決下😌然後就行去藍地站搭輕鐵🚋走人
完成左今次嘅行程， 山のメロン🍈妹妹今次好叻叻👍🏻啊，全程自己行💪🏻差不多行左 5 公里去到藍地大街先頂唔順要抱😆睇黎個山兜可以攞去變賣啦🤣
呢條路綫由屯門站🚈出發，由何福堂上屯門徑，經過彩虹欄杆🌈到達若夢園轉過去藍地水塘🕳️再落藍地，全程 5.7 公里👍🏻，我地連休息影相 3️⃣ 歲到 6️⃣6️⃣ 歲👧🏻👦🏻🧕🏻👱🏻‍♀️👨🏻‍🦱👵🏻👴🏻用左 3 小時 30 分鐘🕞
行程第一個高點就係彩虹欄杆🌈，然後落番少少再上第二個高點就係去藍地水塘上完樓梯個山頂⛰️，之後就一路落山了🥳

總結：

🔹 交通便利，起點🚈同終點🚋都鐵路到達，屯門站V-CITY🏢可以補給晒所有野👍🏻

🔹 沿途只有燒烤埸有🚻秋冬比較少汗出可能唔可以飲太多水

🔹 藍地來回虎地燒烤場🔥比起富地路果邊上落好似簡單一點🤏🏻

🔹 屯門徑路綫四通八達🔀有好多唔同變化🥷🏻如果想挑戰下先好行上東升亭🤣

🔹 難度：⭐⭐ (5⭐為最難)

Categories: 二星 (易行、需少許氣力) 新界西

  1. 自動引用通知: 【香港行山】屯門徑彩虹欄杆望青山｜觀音山左擁新界西北右抱東涌｜下郊遊徑繞藍地水塘 - 一元去哪兒

發佈留言

發佈留言必須填寫的電子郵件地址不會公開。 必填欄位標示為 *