By: 山の爹Posted on

一提到南丫島🏝️，大家應該第一樣諗到嘅就係發哥🎬，跟住就應該係大風車🌬️同埋豆腐花🍮

有云：「上得山多遇發哥🤳🏻，唔知幾時輪到我🤷🏻‍♂️」，小弟就未有呢個福份喇🤦🏻‍♂️，今次我地就一齊入南丫鳥搵大風車🌬️同埋食豆腐花啦🍮

去得離島🏝️，八成嘅船都係響中環碼頭上船🛳️，去南丫島亦都唔例外🗺️，由 IFC 行行人橋過去都會經過見到摩天輪🎡
去南丫島嘅船係響四號碼頭⚓，無論你去榕樹灣定係索罟灣🗺️，行到橋尾落橋向左手邊行就啱晒👈🏻
四號碼頭分開左右👈🏻👉🏻，左邊係去索罟灣👈🏻，右邊就係榕樹灣👉🏻，我地今次行程就係由索罟灣入👈🏻，經南丫島家樂徑🚶🏻‍♂️行去榕樹灣🌲，其實大多數人都係調轉🔃榕樹灣入索罟灣出，我地之所以索罟灣入係因為索罟灣船期比較疏🤏🏻，帶住小朋友👦🏻👧🏻就去程時間比較好就，萬一真要呢呢路路💩趕唔到船都可以變陣去榕樹灣出發😉，如果回程先呢呢路路響索罟灣趕唔到船😨分分鐘要等一兩個鐘食埋飯🐟🦐🦀先走得 (索罟灣船期表按此)
隻船🛳️可以坐三百幾人，不設預定，假日就自己預時間喇😉
我地搭平日 11:50 嘅船🕛，準時登船出發💪🏻
大約 35-40 分鐘嘅船程⏱️，見到一個大魚排🐟就即係到啦🎉
成班友企晒響中門等落船😌，我地咪一齊等囉🤪，點知原來索罟灣係船尾落船🤣，大家千其唔好咁傻豬豬😜
出左碼頭⚓，對正就有公廁🚻，女仕建議船上有時間就可以去定💡，因為呢個公廁一落晒船就會排長龍🐉，男仕就當然無呢個煩惱啦😁
沿途有好多指示牌🪧，只要一直住「榕樹灣」行就唔會錯💡
我地嘅路線就係由閣下在此開始行▶️，沿橙色綫🟠，中途上一上🆙南丫風采發電站🔋，之後再行到橙色綫嘅盡頭完成呢個行程🏁
整頓完畢🉐，向住出碼頭嘅右手邊出發👉🏻，沿途都係一啲食肆🍽️，其中有幾間係比較多人嘅😌
行大約 5 分鐘⏱️，就會離開食肆街，見到天后宮🕍
過左天后宮有分叉路口↔️行左邊👈🏻，因為右邊其實係地盤🪖
沿途都有指示牌同地圖🗺️，估計唔會行錯👌🏻，頭段一直行去榕樹灣，直到你要上去睇風車🌬️
唔使 R 頭喎🤔山のメロン🍈妹妹，前面燈柱有個紅色字嘅牌🏷️，就係寫住去榕樹灣嘅方向，轉右👉🏻入呢個路口就得架喇，其實佢嘅旁邊都有官方指示牌🪧
頭段嘅路都係一啲小上小落嘅海邊路石屎路🛣️，唔算太難行👌🏻
行 15 分鐘左右⏱️，已經兜左個圈去左碼頭嘅對面🆒，左手邊有排綠色野就係頭先落船嘅碼頭附近別喇📌
望上山嘅方向⛰️，我地第一個休息點就係山上面果個觀景亭⛩️
由碼頭出發，約 20 分鐘🕛就會見到「神風洞🕳️」，有經過嘅伯伯話以前洞口已經係海邊黎🌊，所日軍可以用黎伏擊盟軍🪖
「神風洞🕳️」解說📖
洞入面全部都係水，唔建議入去玩🙅🏻‍♂️，響門口玩幾聲迴音走人🎶
繼續前行，會有間村屋士多🏡，有需要可以作少少補給🧃
過左村屋就會有分叉路↔️，由地圖睇兩條路到最後「應該」係會響一間士多連番埋😆，咁啱我地見有人行左邊👈🏻，所以我地就路住行左邊喇👈🏻
藍天白雲青草地☀️☁️🌿，呢日天氣唔錯，直到一陣長命斜上風車佢就陰天☁️，確係無得頂👍🏻
只要唔係平路，小朋友都好開心😹
大約 30 分鐘🕛，就會見到一間小士多🏡，就係頭先右手邊條路嘅滙合點🈴，士多左邊有條路👈🏻，就係斜路嘅開始🆙
有某幾個位斜度都幾大↗️，地下會有橫間間防滑，不過都唔太難應付👌🏻
行大約 15-20 分鐘⏱️，直到你見到垃圾筒🚮，再前少少就會有條路落頭先山腳見到果個觀景亭⛩️
樓梯好短，二三十級左右😌
又見到索罟灣碼頭⚓
難得臨走無晒人😍，梗係影番張相📸，我地響度休息下食少少野，太陽就開始不見了🌥️，陣陣涼風都幾涼爽🌬️
抖夠晒就開始行程🆙，行十分八分鐘又有分叉路↔️，都有指示牌，又係行左邊👈🏻
過左分叉路，個海會由右邊👉🏻去左左邊👈🏻，因為已經去左山嘅另一邊⛰️，呢邊景觀又唔同晒，可以見到發電廠嘅正面🔋
由上一個亭到呢個觀景亭⛩️，大約係 15 分鐘⏱️，由於啱啱先抖完，所以坐唔夠五分鐘就走人🚶🏻‍♂️
如果唔上去睇風車🌀，依家已經係行左一半架喇🎉，之後全部係落山路↘️，如果要睇風車🌀，落完山就要再上多一次山喇🆙
再近啲睇發電廠🔋
落山嘅路有啲位都幾斜🎢，地下會有防滑間間👌🏻
又係分叉路↔️，都仲係左邊👈🏻
又行 15-20 分鐘⏱️，就會落到去洪聖爺灣🏖️
我地咪咪摸摸由起點黎到洪聖爺灣🏖️，大約用左 2 小時⏱️，由於呢度係一個泳灘，所以當然有廁所位啦🚻
繼續沿路行，經過晒啲食肆就會見到有條轉右嘅路👉🏻，轉上去繼續一直走，係一段少少上斜嘅路🆙
行 10 分鐘左右⏱️，就會出到一條大馬路🛣️，如果唔上風車的話❌，繼續直行往燈柱個路口走⬆️，如果上風車🌀就轉右行馬路一直上👉🏻
呢段係 15-20 分鐘⏱️嘅無盡斜路，好彩行嘅時候無咩太陽☁️，唔算好辛苦 👌🏻
「南丫風采發電站🌀」到着，門口寫嘅開放時間係朝七🕖晚六🕕，由於疫情現時長期關閉🈲
風車嘅對面有條路仔上觀景台⛩️，由於我地嘅團友始攰，所以無專登行上去😅，你有興趣當然可以去望下，唔係好遠，上面有個亭望到海洋公園🎢
回程沿路走落去，去到有分叉路↔️我地就轉右行入去👉🏻，望入去係十零廿米嘅上斜路🆙
行完果一少段上斜，就會見到條窿窿路🕳️，轉左落山👈🏻，呢段路比起剛才上山果段路斜，如果上的話會幾吃力，落都可以👌🏻，窿窿路只要行響罅位唔踩落窿都唔算難行😌，行幾分鐘就會完，之後都係普通馬路🛣️
不需 10 分鐘⏱️就會落到山腳，如果想嘆下亞婆豆腐花就轉左行幾十米就會到👈🏻，食完再行番出黎，唔食或者趕船就轉右👉🏻
唔知係咪平日，只有豆腐花同豆漿，上網睇話有魚旦燒賣，可能假期先有吧🤔
一人一碗咪執輸😋，呢個時候就可以睇下需唔需要趕船🛳️，由呢樹行到去榕樹灣碼頭大約係 15-20 分鐘⏱️，我地距離下班船大約仲有 35 分鐘⏱️，拿拿林食完就去碼頭啦，因為下一船要等多 45 分鐘⏱️
離開亞婆豆腐花沿路出番去再直行⬆️，就會開始多番啲人氣，沿路都有啲特式店鋪🏠
話咁快 15 分鐘⏱️就差不多到碼頭⚓，呢度亦有個公廁🚻，上船前可以作最後沖廁🚽
榕樹灣碼頭望住發電廠嘅背面🔋
榕樹灣開出嘅船比索罟灣多一倍咁濟☝🏻，所以我地選擇呢邊走，就算趕唔到都唔使等兩個鐘😼 (榕樹灣船期表按此)
我地 12:30 落船🕜，玩到 16:30 走人🕟，咪咪摸摸就玩左 4 個鐘4️⃣，由榕樹灣返中環，船程大約係 25 分鐘左右⏱️
由索罟灣碼頭⚓再去南丫風采發電站🌀，之後食埋豆腐花再返榕樹灣碼頭⚓，全程大約係 6.5 公里 (💡如果唔上南丫風采發電站可以減少大約 1.5 公里)，我地大大小小行左大約 3.5 小時😅，沿途行下抖下食下野影下相📸，快快樂樂咁玩左一日😁

總結：

🔹 索罟灣船期較疏🤏🏻，船程較長，如平日回程必需檢查好時間⏱️

🔹 香港仔亦有船往返南丫島，可上網找找資料💡

🔹 第一個觀景亭之前果段斜路比較斜，約 15-20 分鐘⏱️，有少少樹蔭唔算太辛苦🌴

🔹 上風車🌀果段馬路🛣️亦都係比較斜，如果大太陽可能會少少辛苦☀️

🔹 兩邊碼頭⚓同中段洪聖爺灣🏖️都有廁所位🚻，上風車途經有兩格流動廁所🚹🚺

🔹 兩個高點 (第二個觀景亭⛩️同風車🌀) 嘅高度都係 80 米內，行開山嘅應該小兒科😁

🔹 難度：⭐⭐ (5⭐為最難)

Categories: 二星 (易行、需少許氣力) 港島及離島

發佈留言

發佈留言必須填寫的電子郵件地址不會公開。 必填欄位標示為 *