【粉嶺-鶴藪水塘】鶴藪停車場、鶴藪水塘家樂徑 - 山の家族 YamaFamily

By: 山の爹 26/04/202125/10/2021

「鶴藪水塘」位於粉嶺，屬於八仙嶺郊野公園嘅一部份，附近有個近排好出名嘅景點 – 流水響📷🍁！呢度嘅交通比較唔方便🤷‍♂️，要響粉嶺站🚇搭 52B 小巴🚌或的士🚕過來，小巴班次大約係三四五個字一班🤪所以唔算好多人😁，而我地就當然係自駕去啦🚗

💡香港另外有個地方叫「鶴咀」，咪以為個名差唔多就係響附近喎，「鶴咀」係響石澳附近嘅😉

鶴藪停車場 — Google Map 輸入「鶴藪停車場」📍，就可以導航到目的地👍，大約有 20 個免費泊車位✌，我地四月份星期六大約下午一點左右到達🕐，仲有四五個吉車位可以泊😍，如果係紅葉🍁旺季就可能要早啲黎霸位喇😊

鶴藪水塘燒烤場 — 泊車嘅位置係鶴藪燒烤場 6 號🔥，疫情關係封晒架喇🙅‍♂️，至於燒烤場 1-5 號響咁深入🙄，其實平時正常果陣係咪真係有人行入去燒架😆

鶴藪水塘燒烤場 — 入左燒烤場就會見到右手邊➡嘅建築物，係廁所🚻企理可以一去👌然後沿住左手邊⬅有邊路出去馬路，轉右手邊➡一直走⬆一直走就會上到去「鶴藪水塘」架喇😎

鶴藪水塘 — 同「河背水塘」一樣，行上水塘段路仲「金」過行水塘個家樂徑😆要有心理準備😜

鶴藪圍 — 一路行會經過「鶴藪村」同「鶴藪圍涼亭」⛩，搭小巴🚌就可以響呢度附近落車喇🚶‍♂️

鶴藪水塘 — 再一直走就會見到第一個閘口🚧，閘口之前基本上都係平路，過左閘口就開始上斜喇↗

鶴藪營地 — 行一陣會經過「鶴藪營地」，疫情關係封閉了😷

鶴藪水塘 — 第二個閘口🚧，過左之後再斜啲🤣

鶴藪水塘 — 沿途有一兩張凳可以抖下🤪，千其唔好夾硬黎😆同記住「自己垃圾自己帶走」呢個不變嘅定律👍

鶴藪水塘 — 當你一路行見到呢對流動廁所🚻，即係你差不多到水塘啦，加油啊🎌！(我地無去過呢對廁所，不過偷聽到人講話都算企理🤪)

鶴藪水塘 — 🍈妹妹頭先休息食完野，俾人氹左落地行🚶‍♂️

鶴藪水塘家樂徑 — 我地用左一個鐘🕑，由停車場爬到上黎「鶴藪水塘家樂徑」😅，呢段路大約係 2 公里✌，估計如果專心行三十分鐘應該就會到🤣

鶴藪水塘 — 黎到呢度，你要選擇向左走定還是向右走🔱，理論上條家樂徑係一個圈🔄，行邊邊最後都會返黎呢度🏁；左邊一開始係石屎路，然後慢慢一路上斜↗，一半之後會轉行山路，上吓落吓咁，最後樓梯落番黎🏁；如果行右邊，就要上呢條「傳說中嘅 68 級樓梯😨」(我忘記左數係咪真係 68 級🤣)，之後上吓落吓嘅山路，一半之後就開始變做少少落斜嘅石屎路，最後黎番呢度🏁

鶴藪水塘家樂徑 — 我地選擇左「先苦後甜」(我地係咁覺得🤣)，先行梯級上🆙，再慢慢落番黎☺

68級樓梯 — 出癹💨

鶴藪水塘 — 望番落去其實都真係幾高同幾斜🤪

鶴藪水塘 — 係一個好長嘅水塘👐

鶴藪水塘 — 頭半段係呢 D 沙石路😁，上吓落吓唔算辛苦😎，下午呢邊陰頂☁，回程晒正🌞；有一樣野要注意💡就係入左去之後差不多全程都收唔到電話訊號📴，要靠電話先生存到的話就要留意喇😆 (我係用「數碼通」嘅😎)

鶴藪水塘 — 堤壩

鶴藪水塘 — 頭半段沙石路

鶴藪水塘 — 行左一陣就會見到第一個分叉路，如果想行過「流水響」或者「九龍坑山」，可以沿樓梯行上去😁我地繼續直去往「沙螺洞」方向🧭

鶴藪水塘 — 🦖哥哥小導遊😆

鶴藪水塘 — 發現🍈妹妹原來鍾意行山路，一見山路就會自己行😅

鶴藪水塘 — 尼日天氣唔錯，唔太熱又有啲風🌬

鶴藪水塘 — 差不多行左一半，🍈妹妹終於頂唔順要上番佢嘅「汗血寶馬」🐎因為夠鐘瞓晏覺😴

沙螺洞 — 行左一個鐘左右，就會到達第二個分叉路🔱，今次個分叉路口係去「沙螺淍」🌌，呢度呢度就即係已經行左一半啦😊，我地唔係去果邊，所以唔需要上去🙅‍♂️，左手邊條咯開始落山喇🎉

鶴藪水塘 — 過左「沙螺洞」分叉口，就開始落樓梯↘

珠坑橋 — 落左一陣就會去到一條叫「珠坑橋」🌉嘅木橋，拍個照留個念繼續前行📷

鶴藪水塘 — 我叫🦖哥哥記住，今次行家樂徑，認住有爸爸媽媽拖住小朋友嘅牌行就啱架喇👨‍👩‍👧‍👧

鶴藪水塘 — 過左「珠坑橋」基本上都係行呢 D鋪過嘅石路👍

鶴藪水塘 — 下午行，前半陰頂🌥，後半晒正🌞前半段就係響正山谷嘅對面😁

鶴藪水塘 — 行左陣就見到第三個分叉路口🔱，撞住「衛奕信徑 9 段」行去「八仙嶺」同「平山寨」嘅😎

鶴藪水塘 — 到左八仙嶺個分叉路路口，就係果個三號燒烤場🔥揸車再行上黎講緊最少都成個鐘，有無人真係會攞住 D 野上黎 BBQ🔥 架🤣

鶴藪水塘 — 呢度有枱有凳🪑有涼亭⛩，係休息嘅好地方👍，過左呢度前面有個出口出左轉右➡，之後嘅路已經係完全無難度嘅石屎路了😎

鶴藪水塘 — 「先苦後甜」﹐尾段就係呢 D 甜嘅廣闊石屎路😍

鶴藪水塘 — 話咁快😁，兩個鐘🕓之後我地就返番落黎堤壩啦🤣 (專心努力行應該一個鐘就完成的⏱)

鶴藪水塘 — 堤壩景

鶴藪水塘 — 山谷景

鶴藪水塘 — 水塘景

鶴藪水塘 — 影完一輪相📷沿住原路快快樂樂落山去👫

鶴藪圍 — 鶴藪圍，俾我地見到架小巴🚌🤣

鶴藪水塘燒烤場 — 🦖哥哥仲有氣力，獎勵佢玩一遙控車先走🏎

鶴藪水塘 — 上落各大約 2 公里✌，水塘家樂徑約 2.5 公里😁，加加埋埋大約行左 6.5 公里😎，加埋影下相📷行黎行去🚶‍♂️；上斜一個鐘🕑，行水塘兩個鐘🕓，落斜快啲用左 45 分鐘🕔，我地全程行左三小時四十五分鐘🤪如果專心行應該兩個鐘就攪掂架啦👍

總結：

🔹有免費停車場唔需要違泊，非旺季車位唔算緊張，泊低去鶴藪又得，去流水響亦得

🔹如果燒烤場重開或紅葉旺季，可能真係會無位，要早啲去攞位

🔹小巴班次唔太密，行完可能要 CALL 車走

🔹鶴藪水塘同流水響水塘其實都幾近，有心有力可以行晒兩個

🔹難度：⭐⭐ (5⭐為最難)

Categories: 二星 (易行、需少許氣力) 新界東八仙嶺郊野公園水塘灌溉水塘自己垃圾自己帶走請勿違例泊車鶴藪鶴藪停車場鶴藪家樂徑鶴藪水塘

Warning: printf(): Too few arguments in /home/dcdpoyhl/yamafamily.royning.hk/wp-content/themes/travel-master/comments.php on line 47

自動引用通知: 【粉嶺-流水響】流水響水塘、流水響郊遊徑 - 吔媽番埋黎 YamaFamily - 18/05/2021
自動引用通知: 【粉嶺-流水響】流水響水塘、流水響郊遊徑 - 山の家族 YamaFamily - 18/05/2021

發佈留言取消回覆